Monday, November 9, 2009

Cute Kong Pagbati
By Lycel D. Caingcoy

Kahinumdom ko sauna
Maglanat-lanat tang duha
Sa ilalum sa punong mangga
Kanunay tang magakatawa.

Sa ka-agbon ug ka-init sa dalan,
Pag-hapla ko imu akong gitabangan
Gipatidog mo ako ug lagi gipaspasan
Maayo nalang kay anaa ka sa akong kiliran.

Wa' mo pa ba kalimti?
Magbalay-balay sad ta permi
Gisulog-sulog pa tag gi-abi-abi
Kay kitang duha magkuyog sige.

Ug didto nag-sugod ang cute kong pagbati
Daw ako ang reyna, ug ikaw akong hari.
Sa tanang lalaki, ikaw ang gipalabi
Ikaw lang gud ang higugmaon sa tibuok kong kinabuhi.

Ikaw ang maambong bituon sa kadagatan,
Ikaw ang labing mahayag nga bulan,
Daw ikaw ang adlaw sa'kong kalibutan
Takus nga makauban sa akong kalisdanan.

Apan naputol mga maayo kong adlaw
Mga malipayong panghitabo, tanan nahanaw
Kay s tuman natong pag-kuyog, nakabantay akong magulang
Mi-sumbong dayon sa akong Inahan ug Amahan.

"Ayaw sa gud ni-ana Inday," tugon sa akong Mama.
"Daghan pa kang dapat makat-unan," dungag pa ni Papa.
Labaw sa tanan, ikaw gayod bata pa.
Wala kay laing huna-hunaon, 'kon dili ang pag-eskuyla.

Sukad ni-ato, masulob-on kong nangamuyo.
Ni-dangat sa Ginoo, ug kaniya naga-ampo
Nga unta hatagan ako ug maayong buot
Tapuson kinibng gibating kangut-ngot.

Ug kay lagi buotan kong pagka-anak,
Tambag kanila akong gi-tahak
Mayra gud lagi, kay cute akong pagbati
Dili tantong sakit ang akong nasinati.

Sa kasikas sa dahon, ug dagan sa panahon,
Wala ko na hikit-i ang akong pag-laum
Masusi kong gipakyas gugma nakong matarong,
Aron pag-eskuyla nako ang unahon.